Bugale ar pesketaer

Genre
Poésie
Langue
Breton
Source
Les sources sont particulières à chaque texte
Remarques
Nous avons modernisé l’orthographe tout en conservant certaines tournures d'origine (mutations, particules verbales...).
Transcription
Sébastien Marineau
Dans le même ouvrage :

Hon tad zo war ar mor, emañ e beg ar Raz ;
          Breur, ken a* zistroio, pedomp !    [sic] 
E vag a zo bihan, hag ar mor a zo bras ;
          Aotroù, bezit truez ouzhomp !

          Mirit, Aotroù, bag ’r pesketaer
          Diouzh kerreg ha diouzh gwall amzer,
          Mirit o zad da zaou vugel
          ’Rankfe hepdañ siwazh ! mervel.

          – Sell, breurig, un dra bennak wenn,
          E rez ar mor, pell a welan…
          – E rez ar mor, c’hoar, o tremen,
          Ul labous eo anvet gouelan.

          Gouelan, gouelan, pelec’h emañ
          ’R pesketaer, tad Job ha Tina ?

Hon tad zo war ar mor, emañ e beg ar Raz ;
          Breur, ken a zistroio, pedomp !
E vag a zo bihan, hag ar mor a zo bras ;
          Aotroù, bezit truez ouzhomp !

          Marv hor mamm, da gloc’h an noz
          Ez eas a Vreizh d’ar Baradoz…
          Hag abaoe nemet hon tad,
          Den ne sec’has hon daoulagad.

          – Breur, sell ! breur, setu e c’houel !
          M’he gwel o tont, dreist ar garreg…
          – Dreist ar garreg gant an avel,
          C’hoar, ur goabrenn zo o redek.

          Koabrenn, koabrenn, pelec’h emañ
          ’R pesketaer, tad Job ha Tina ?

Hon tad zo war ar mor, emañ e beg ar Raz ;
          Breur, ken a zistroio, pedomp !
E vag a zo bihan, hag ar mor a zo bras ;
          Aotroù, bezit truez ouzhomp !

          Ni hor beus evit holl vadoù
          Bagig hon tad, e rouedoù,
          Hag un ti soul war an tevenn…
          Digor an nor, an oaled yen !

          – Breur, sell c’hoazh, rak m’em eus gwelet
          Un dra bennak deut war an traezh…
          – Ned eo netra : ur roeñv torret,
          Roeñv ’r pesketaer, va c’hoarig kaezh !

          Roeñvig torret, pelec’h emañ
          ’R pesketaer, tad Job ha Tina ?…

Hon tad zo war ar mor, emañ e beg ar Raz ;
          Breur, ken a zistroio, pedomp !
E vag a zo bihan, hag ar mor a zo bras ;
          Aotroù, bezit truez ouzhomp !

                                        G. Milin