Dalc’h, kroaz vihan !

Genre
Poésie
Langue
Breton
Source
Rennes, Manuscrit 0990 de la Bibliothèque municipale de Rennes « Les Champs Libres »
Remarques
Nous avons modernisé l’orthographe tout en conservant certaines tournures d'origine (mutations, particules verbales...).
Précisions
Pages 175-177
Transcription
Sébastien Marineau
Dans le même ouvrage :

     d’an aotroù Vallée, rener « Kroaz ar Vretoned* »    [ur gelaouenn] 

     Dalc’h, kroaz vihan !
A-boan e oas deut en hon zouez,
Tud diskiant ’lâre ’n ur vouezh
     ’Rankfes pakañ.

     Dalc’h, kroaz vihan !
An avel ’dlee da ziskar
’Sankas da wrizioù en douar
     Donoc’h-donañ.

     Dalc’h, kroaz vihan !
Strizh ha diaes e oa da hent :
Mont war-raok ’teus graet evelkent
     Hep diskuizhañ.

     ***

     Dalc’h, kroaz vihan !
Ur gozhenn ’tevoa da arat,
Ha bepred difonn e teul had
     An troc’h kentañ.

     Dalc’h, kroaz vihan !
C’hwec’h vloaz zo ’troez an irvi :
Me ’wel un eost o tareviñ
     Deus ar c’haerañ.

     Dalc’h, kroaz vihan !
Dav de’i ha bec’h war al labour !
A bep tu ’teuio dit sikour
     El leur-zornañ.

     ***

     Dalc’h, kroaz vihan !
Kavet em eus ’n ur gozh lojenn
Ur blokad tud evit az lenn
     ’Tilezen koan.

     Dalc’h, kroaz vihan !
’Vez ket foetet er fornigell ;
Pleget kloz e vez en armel
     Er c’horn sklêrañ.

     Dalc’h, kroaz vihan !
Pa ver karet evel ma’z out,
War vignoned ’c’heller fiout
     Ha ’n em harpañ.

     ***

     Dalc’h, kroaz vihan !
Yezh hon bro oa hanter-varv,
Met ken yac’hus eo da louzoù 
     Ma rank bevañ !

     Dalc’h, kroaz vihan !
Mil bennozh war ar Vretoned,
Ha mallozh ruz d’ar C’hallaoued
     ’Klask hon flastrañ !

     Dalc’h, kroaz vihan !
Doug bepred sonn banniel hon feiz,
Ha kerzh en hent ’gas da Zoue
     Er penn kentañ !!!