ar Barzh (2)

Genre
Poésie
Langue
Breton
Source
Les sources sont particulières à chaque texte
Remarques
Nous avons modernisé l’orthographe tout en conservant certaines tournures d'origine (mutations, particules verbales...).
Transcription
Sébastien Marineau
Dans le même ouvrage :

    II

Mignoned ! pell eus ar c’hêrioù,
Pell eus holl lufr ar manerioù,
Pell eus an trouz hag ar safar
Klaskit d’ar barzh ur c’horn douar.

Ya ! Klaskit d’añ ul lec’h e Breizh,
Ul lec’hig klet evel un neizh,
E penn ur run dreist d’un draonienn
Bordet gant brueg ha lann-melen.

Grit d’añ eno, ’n ul liorzh c’hlas,
Un ti na vo bihan na bras,
Un ti faset brav d’ar c’hreisteiz
’Ba ’n disheol eus ur blochad gwez.

Ur blochad pin pe derv kozh,
An avel enne – deiz ha noz –
O tamantiñ pe oc’h ouelañ,
Oc’h yudal pe o c’hrozmolañ !

Bemdez enne an evnigoù
D’an hañv o kanañ o sonioù,
O richanañ sonioù lirzhin
Koulz da serr-noz ’vel da vintin !

Ra vo, en dremmwel, menezioù
Glas-wenn o c’hrec’h er brumennoù,
O zreid disec’h o klask glebor
En eonenn ouzh ur c’hwagenn-vor !

Dreist d’e ’pigno an alc’hweder
Betek ’n em goll e barr an aer,
Kannad o vont da zor an Neñv*    [pe an Ee]
Gant keloù mat ar gouloù-deiz !

A-dreñv, kloc’hig un abati
’Vo damglevet eus tal an ti,
Hag a lâro d’ar barzh bemnoz
Dougen e soñj d’ar baradoz !