– Biñv ! bañv ! kloc’hoù
          ’Us d’ar maezioù,
          ’Us d’an aodoù,
Kasit d’ar bed holl ar c’heloù…
     – O bugel e vammig !
     Badezet bremaik,
     Bez, un deiz, Lemenig !

          Kousk ’n ez kavell :
          Me da luskell,
          O ma bugel !
Ouzh un aelig gwenn c’hoazh heñvel.
     – Met adalek bremañ,
     O Doue ! lak ennañ
     Nerzh Arzhur ha Morvan.

          – Bugel dister,
          Gant an amzer,
          Nerzh ha braster
Az pezo ’vit bezañ salver,
     Salver hon Breizh karet,
     Deomp-ni diouganet,
     Gwechall gant ar Varzhed.

          Deus Breizh-Izel,
          Bro da gavell,
          Betek mervel,
An anv ’vo war da vuzell.
     Gant ar Gall milliget
     Na pa vez merzheriet,
     Te ’youc’ho : Breizh bepred !

          Dit me ’gano
          Ar Re varv,
          Lufr o anv :
N’eo ket laezh hepken az mago.
     Bez ar brasañ Breizhad,
     Euzhus d’an Ermaeziad,
     Kresk evit an Argad.