I

Genre
Théâtre
Langue
Breton
Source
Saint Brieuc, Moulerezh Sant Gwilherm, sans date
Remarques
Nous avons modernisé l’orthographe tout en conservant certaines tournures d'origine (mutations, particules verbales...).
Transcription
Sébastien Marineau
Dans le même ouvrage :

    E ti an aotroù Pendolog

KEVRENN I

    AN AO. PENDOLOG ur baner en e zorn

Yann !… Yann !…

    YANN

Aotroù ?…

    PENDOLOG

Setu amañ teir c’had er baner-mañ ; kemer ha kas anezho da di va mignon Bidoch. Kalz e kar ar gedon ha kement-mañ a ray ur blijadur c’hwek dezhañ. Hast afo, hag astenn da zivesker. Klevet a rez ?…

    YANN

Ya, aotroù ; amzer hepken da lakaat va c’halabousenn ha va botoù-ler.

    PENDOLOG

Kae buan e-pad ma skrivin ur roudenn-skritur pe ziv da’m mignon.

KEVRENN II

    AN AO. PENDOLOG e-unan

(Skrivañ ha lenn uhel a ra pep ger.) « Va mignon ker, ur blijadur vras eo evidon gellout kinnig teir c’had dit. An dra-se a ziskouezo dit pegen evurus eo bet va abadenn chaseal. Krediñ a rafen ober gaou ouzh hor mignonaj kozh, o chom hep kas dit peadra da ober evit meurlarjez un tamm lip-e-bav. Lavar da Gatell lakaat he holl ouiziegezh da ober mat ar geusteurenn. Da vignon kozh, Pendolog. » (Komz a ra.) Kement-mañ a ray, a gredan, ar vrasañ plijadur da’m mignon Bidoch. Petra bennak ne dalv nemeur an donezon, n’eo ket, evelato, eus an disterañ kennebeut.

KEVRENN III

PENDOLOG hag e VEVEL

    YANN berr e alan, a las e votoù dirak e vestr

Aotroù, prest ’on ; pa gerot ez in.

    PENDOLOG

Mat eo !… Setu amañ al lizher ha kemer ar banerad gedon-se, ha kas anezho holl da’m mignon Bidoch. Klevet ec’h eus ?…

    YANN

Ya, aotroù.

    PENDOLOG

A-benn koan e vezi distro, ’michañs ?

    YANN

Oh ! ya, aotroù ; mar gellan, met ur pennad mat a hent a zo ac’hann di ; diskempenn eo an hentoù, hag ar baner a zo pounnerik, met n’eus forzh, ne vin ket pell.

    PENDOLOG

Dal, kemer ur banne evit ma savi gwelloc’h da seulioù ; dreist-holl, bez fur, ha diwall mat ouzh ar bod iliav.

    YANN

Aotroù, bezit disoursi. Ur banne a gavan mat, rak morse n’en deus graet droug din. Gouzout a rit, aotroù, penaos ’on mat ha direbech evit kement hini a zo mat evidon, evidoc’h-c’hwi dreist holl, rak c’hwi zo bepred leun a vadelezh, a garantez, a…

    PENDOLOG

A-walc’h ! a-walc’h ! ha kae buan ; ur wech all e ri kudoù din. Bez difrae ha divorfil, rak mall bras am eus da’z kwelet distro evit kaout respont digant va mignon Bidoch ; met, ur wech c’hoazh, diwall da vezañ touellet gant ur bod iliav bennak.

    YANN

Aotroù, bezit dinec’h, n’ho pezo ket a lec’h da glemm. (Yann a salud hag a ya kuit en ur ganañ.)

          Kae d’an drotig,
        Paourkaezh Yannig,
Ha kan bepred, war varc’h ha war droad.
          Kae d’an drotig,
        Paourkaezh Yannig,
      Bale seder ha kan a galon vat.

    PENDOLOG en ur ziskouez Yann a zo sortiet

Gant ma ray ar paotr-se e dro !… heum !… heum !…