V diviz

Genre
Theatre
Language
Breton
Source
Redon, Imprimeries Réunies, A. Bouteloup et fils aîné, sans date
Notice
The spelling has been modernized, but some forms (mutations, verbal particles...) has been kept.
Transcription
Sébastien Marineau
In the same work :

AN HEVELEP RE – AR RE WENN

AOTROU KERMOGER 
Deiz mat deoc’h, va mignoned ! 
 
FAÑCH 
Doue r’ho pennigo, aotroù Kermoger ! Da belec’h ez it gant an dud-se ? 
 
AOTROU KERMOGER 
Fañch kaezh, ha c’hwi, va mignoned, va bugale a c’hallfen lavaret, keit all zo ec’h anavezan ac’hanoc’h, daoust ha n’ouzoc’h-hu ket c’hoazh emañ an tan hag ar gontell oc’h ober reuz bras en hor bro ? Bro-C’hall, heñvel ouzh bag Sant Per, en em wel a bell amzer dismantret gant an aveloù foll ha darbet dezhi mont da netra… Ur maread tud trevariet o spered a zo deuet da vezañ mistri war ar vro hag a fell dezho chañch penn da bep tra. Nac’het o deus o Doue, diskaret ar roue diwar e gador ha dibennet anezhañ evel ur torfetour. 
 
FAÑCH 
Mantrus eo, aotrou Kermoger ! 
 
AOTROU KERMOGER 
E Pariz an asambleoù, ar c’hluboù dre amañ, heñvel mat ouzh korventennoù c’hwezhet gant an droug-speredoù, ne c’houlennont nemet dismantr ha brezel… Ar vugale hon eus gwelet oc’h en em sevel enep o zud, ar priedoù dispartiet hag ar venec’h taolet er broioù estren, d’an harlu. Brezel, tan-gwall ha lazherezh, n’eus ken mui dre-holl er rouantelezh : da ober pep tra ez eus frankiz, nemet da bediñ Doue ! Madoù ar re vras a werzher, o manerioù a zever ; tec’het a rankont eus o bro pe o c’haser d’an dibennerezh. Ar roue, e bried hag e c’hoar, mezhus eo hel lavaret ! a zo bet muntret e Pariz. Gwelet hon eus ar bastored kaset eus o farrezioù ; serret, saotret pe gwerzhet eo hon ilizoù. Hag ar veleien n’int ket aet d’an harlu, ar re o deus kavet gwelloc’h chom gant o deñved a zo bremañ enklasket, graet an hu warno evel war ar bleizi gouez, ha p’o c’haver e kaser anezho d’ar bac’h hag ac’hano prim d’ar chafod evit bezañ dibennet. Ac’hanta, Fañch, ha c’hwi, va mignoned, dirak kement a reuzioù, a zismantroù, a wad skuilhet hep abeg, ni a zo savet ha stourm a fell deomp, ker e werzhimp hol ler d’ar chas gall, daoust n’omp ket gwall niverus. Ker e gousto dezho ha gwazh a se evito. Kreskiñ a ray an niver ac’hanomp ; dont a ra Bretoned davedomp eus pep korn a Vreizh ; hor c’henvroiz a zo goapaet, disprizet, gwasket ha merzheriet zoken e kant doare, hor c’henvroiz a glev ar gwad o virviñ en o gwazhied, ar vezh a sav d’o zal, hag e loc’hont o youc’hal : “Torr e benn !” 
 
HERVE 
Ha me ivez a zo o vont ganeoc’h da zifenn hor beleien, hon ilizoù, hor c’halvarioù. Tan ha kurun ! War va c’horf ez ay ar chas divezhet a-barzh kregiñ en hor beleien ! 
 
AOTROU KERMOGER 
Ne c’heden ket nebeutoc’h diganez, Herve. Anaout a ran ac’hanout pell zo, ha gouzout mat a ran ’out bet atav ur Breton kalonek leun a zoujañs Doue. 
 
GWENOLE 
Ha me n’emaon ket o vont da chom war ho lerc’h. Me a vezo eveldoc’h soudard an Aotroù Doue ! Hoc’h aotre a root din, n’eo ket ’ta, va zad ? 
 
FAÑCH 
Brav eo mont evel-se da zifenn an Iliz hag ar Vro ! Hogen, un dra c’hrevrus eo, va mab ; taol evezh ez pezo tro meur a wech da vezañ tizhet gant tennoù fuzuilh ar Re-C’hlas. N’out aet morse eus ar gêr betek-henn, yaouankik ’out c’hoazh ivez, ha marteze, aon am eus, e savo buan keuz ganez !!! 
 
GWENOLE 
Tamm ebet, va zad ! Arabat eo deoc’h bezañ nec’het gant an dra-se. 
 
FAÑCH 
A-hent-all, da vamm ha me a zo o vont war an oad, ha mar marvez er brezel, petra ’deuimp-ni da vezañ ? 
 
GWENOLE 
Doue, va zad ker, eo atav ar Mestr. An amzer dremenet, an amzer a dremen hag an amzer da zont a zo etre E zaouarn. N’en em chalomp ket eta gant ar pezh a dle c’hoarvezout. 
 
FAÑCH 
Komz a rez evel ur beleg, va mab ; anat eo emañ Spered Doue ennout. Kerzh eta, va faotr, ha gra bepred labour vat. Mar marvez dindan taolioù ar chas gall e vezo ebat ganin lakaat em fenn e vezi aet d’ar Baradoz gant kurunenn ar Verzherien. 
 
GWENOLE a lamm da vriata e dad 
Bennozh Doue deoc’h, va zad, graet hoc’h eus ur mab eürus ! 
 
AOTROU KERMOGER 
Kenavo, va mignoned, ne skuizhomp ket ganeoc’h, met n’hellomp ket dale pelloc’h. Da nav eur hanter pe zek eur emberr e teuot davedomp da goad Tolvezeg. Mat kavit unan pe unan eus hor soudarded war hoc’h hent e vezo goulennet diganeoc’h : “Piv a zo dre amañ ?” hag e lavarot kerkent ger ar ged : « Doue ha Breizh ! War sav ! »

HERVE 
Doue ha Breizh ! Tan ha kurun ! War sav ! 
 
GWENOLE 
Kenavo bremaik !… 
 
Ar soudarded a ya kuit en ur ganañ adarre. 
 
Ar chas a glevan oc’h harzal ! Setu ar soudarded c’hall ! 
Tec’homp kuit ’trezek ar c’hoadoù ! Kasomp a-raok hor chatal ! 
Daoust hag eñ, paotred Kernev, e c’houzañvimp da viken 
E c’houzañvimp ar vac’herien a wask al labourerien ?