II Diviz

Genre
Théâtre
Langue
Breton
Source
Vannes, Lafolye frères, 1908
Remarques
Nous avons modernisé l’orthographe tout en conservant certaines tournures d'origine (mutations, particules verbales...).
Transcription
Sébastien Marineau
Dans le même ouvrage :

AN HEVELEP TUD, UR FLOC’H

AR FLOC’H o saludiñ
An aotroù Arzhur a Vreizh-Izel, gant Lan a Zinan, e ziwaller, a zo o paouez degouezhout war an dachenn, gant un dornadig soudarded.

FILIP
N’halle bet ober brasoc’h plijadur din. Da Eud. Aotroù Eud a Vourgogne, it da zegemeret hor c’henderv hag hentit anezhañ betek an deltenn-mañ gant an holl enor dleet dezhañ.

Eud a y-a er-maez da heul ar Floc’h, dre ar goueled.

LOEIZ
Mall bras am eus da welet ar bugel enorus-se, a garan evel pa vije va breur.

HERVE
Heñvel-poch eo ouzh e vamm, an dukez vat Konstañs ha na gouezhas nemet dre drubarderezh Raoul a Jester...

LOEIZ
Hervez a leverer, e roas koulskoude meur a daol kalet dezhañ. Gouezet he deus reiñ d’he mab, a-gevret gant feiz bro-Arvor, meulet dre-holl, un deskadurezh dispar war ar brezel ha war draoù-kaer istor ar varc’heien. A-raok pell, moarvat, e ray e nozvezh armoù, rak evit adkemeret ar Poatou, ar Men hag an Añjou, e vezo ret dezhañ diskouez e hardizhiegezh.