I Diviz

Genre
Théâtre
Langue
Breton
Source
Vannes, Lafolye frères, 1908
Remarques
Nous avons modernisé l’orthographe tout en conservant certaines tournures d'origine (mutations, particules verbales...).
Transcription
Sébastien Marineau
Dans le même ouvrage :

FILIP-AOGUST, HERVE A NEVERS, EUD A VOURGOGNE, LOEIZ A VRO-C’HALL, DIJENTILED GALL, TUD A VREZEL, SKOEDERIEN PE FLOC’HED

Pa saver ar ridoj, Filip-Aogust a zo en e sav e-kreiz an teatr, e Vab, ha Dijentiled en-dro dezhañ. Holl o deus o armoù en o c’herc’henn.

FILIP
Setu pemzek devezh, va zud vat, m’emaomp o vresañ poultrenn war-lerc’h ar Saozon. Tizhet hon eus anezho koulskoude. Hor park a ehan a zo dres dirak Gournay, el lec’h m’eo Yann Dileve en em dennet gant aon razomp. Ret e vo deomp dont a-benn hiriv eus ar gwaz lorc’hus-se. Va mab, peseurt taolenn hoc’h eus dreset war doare ren ar c’hrogad a zeu ?

LOEIZ
Setu hi amañ, va zad. Astenn a ra dezhañ paper-parch.

FILIP o sellet outañ
An dra-se eo !... An aotroù Herve a Nevers e penn an dennerien... Hor c’henderv Eud a Vourgogn a ziwallo aodoù ar Sen, e-pad ma vezo an aotroù kont a Sant-Pol o sturiañ soudarded ar c’hreiz... Piv eta a ziwallo ar soudarded dalc’het e mir ?

LOEIZ
Kredet em eus e raje mat an aotroù Gui a Zampierre kemeret warnañ ar garg-se ken pounner ha ken risklus ; evit-se ez en em zalc’ho e-kuzh er c’hoadig a zo war bordig ar stêr a zegas dour da zouvezioù ar c’hastell.

FILIP
Gwelet a ran, va mab, hoc’h eus pleustret mat pep tra. Koulskoude, e pelec’h e lakaot ar soudarded war varc’h ?

LOEIZ
Va-unan, aotroù, em eus soñj d’o ren, gant sikour Renaod, kont a Voulogne. Ni en em stenno war hent an Normandi, evit mont war-lerc’h ar re a falvezfe ganto tec’het, ha, mar bez ret, skoazhellañ askell gleiz hon arme.

FILIP
Ho toareoù, va mab, a zo re un den gouiziek-meurbet er vicher, ha neketa, aotroù Eud ?

EUD
Aotroù, n’eo ket nebeutoc’h gouest an aotroù Loeiz a Vro-C’hall da gas e vennozhioù da benn evit ned eo d’o skrivañ ; maneañ ’ra ar vouc’hal kerkoulz hag an hardishañ e-touez ar vrezelerien gozh.

HERVE
Ar re-mañ holl o deus hen anver Kalon-Leon, evel ma’z anved Richard, ar roue marv.

FILIP
Ni her gwelo hiriv stag gant al labour. C’hwi, va mab, a lezo renadurezh ar varc’heien gant ar c’hont a Voulogne : me ’fell din ho kaout em c’hichen pa bignimp war mogerioù-tro ar c’hastell.

LOEIZ
Ya, va zad, ha gant sikour Doue ni a deuy a-benn eus laer digalon tron rouantelezh Bro-Saoz.

HERVE
Ur reuzeudig ha n’en deus ket bet a vezh o laerezh e niz, bugel c’hoazh, ha dre-se re zinerzh evit herzel outañ.

FILIP
Klevet em eus koulskoude eo va c’henderv Arzhur leun a vailhantiz hag a galon.

EUD
Gwir eo, aotroù ; hogen, evel ma’z eo gwall yaouank, emañ war var da ober meur a dra hep evezh a-walc’h.

HERVE
Ouzhpenn ma teu an drubarderezh da sikour kalz re vat c’hoantegezhioù disleal Yann Dileve. Lavaret a reer en deus gounezet senechal ar Poatou, o kargañ dezhañ e c’hodelloù a aour.

FILIP
Dre sant Denez ! Va c’henderv a gavo ennon un difennour hag ur skor. Hen touiñ a ran war va c’hleze a varc’heg [!].