VI Diviz

Genre
Théâtre
Langue
Breton
Source
Vannes, Lafolye frères, 1908
Remarques
Nous avons modernisé l’orthographe tout en conservant certaines tournures d'origine (mutations, particules verbales...).
Transcription
Sébastien Marineau
Dans le même ouvrage :

AR BARZH e-unan

Er penn pellañ e weler ar gward oc’h ober e dro – noz teñval

Setu meur a guzul kuzhet dizoloet ha diskaret d’an traoñ ! ar re a yoa en em glevet evit gwerzhañ hon duk ker a zo anavezet gant an holl ! Daoust hag an trubarderezh en devezo erfin un diskuizh ? Nann, ar c’hoant da gaout arc’hant na chom a-sav dirak netra ! Abaoe m’on deuet eus Gourne em eus tremenet n’ouspet nozvezh war vale o tiwall buhez hon duk ker. En noz diwezhañ c’hoazh edon aze, va skouarn astennet da selaou an disterañ trouz, o sellet e-kreiz an deñvalijenn. An aon da welet ur goutellasenn o lugerniñ enni am dalc’h dihun. En deiz n’hellomp ket bezañ nebeutoc’h war evezh : ober goulennoù ouzh ar spierien, kemeret al lizhiri diasur, tremen dre bep seurt stummoù evel an torfed, mont da welet ar vro, kement-se holl a rankomp ober gant kalz a finesa. Hiriv, em eus ranket stourm war mogerioù kêr, goude un emgann korf-ouzh-korf gant Reier. Skuizh-marv eo va c’horf ! Skuizhder ar brezelioù a deu a-benn eus an houarn hag eus ar maen-marbr ; ret eo din eta diskuizhañ... O va Doue ! taolit evezh war va mestr yaouank, ha distroit diwarnañ mennozhioù an dud fall ! en em denn a ra war-zu ar penn pellañ, hag e chom a-sav en ul lavaret a vouezh uhel : Gwardoù, bezit war evezh !

Ar gward a lavar eveltañ ; hag e klever an hevelep youc’hadenn adlavaret er pellder. Ar Barzh a ya er-maez.