daskor - facebook  daskor - css

Daskor

Yannig Skolan – ar Gwall-daol (2)

Genre
Poésie
Langue
Breton
Source
Paris, Didier et Cie Libraires, 1867
Remarques
Nous avons modernisé l’orthographe tout en conservant certaines tournures d'origine (mutations, particules verbales...).
Transcription
Sébastien Marineau
Dans le même ouvrage :

    II

Pa ziwalle loened e zad,
N’he doa de’i soñj nemet da vad ;
N’he doa gouelet ’met ur wec’h ’ne’i,
’Gwelet he dañv’ mont gant ar blei’* ;    [bleiz] 

Nemet ur wec’h n’he doa gouelet ;
Setu div bremañ he deus graet ;
Gouelet he doa ha graet ur son
A ve kanet dre ar c’hanton :

– Kaoñ ! kaoñ ! da’m dañv’ig gwenn-gornik !
Kaoñ ! kaoñ ! da’m dañv’ig penn-gwennik !
Kaoñ ! siwazh ! kaoñ, kaoñ ! da’m dañvad,
Hag a oa ul loenig ken mat !

Yannig Skolan oa ’tont d’ar gêr,
Gantañ en dorn e grog pounner :
– Morisetig, c’hwi a gan gae,
Ur bokig a refet din-me.

– Ur bok deoc’h-hu me ne rin ket !
Ur paotr fall ’oc’h mar zo er bed. –
Hag hi kuit diouzhtu o redek ;
Allaz ! na oa tost kêr ebet.

Hag eñ war he lerc’h a lammas,
Ha skoiñ ganti teir gwech a reas* ;    [W res] 
Ken hi ’file* ’n he foullad gwad,    [LV tomba] 
Serret ganti he daoulagad.