daskor - facebook  daskor - css

Daskor

Paotred Plouie (3)

Genre
Poésie
Langue
Breton
Source
Paris, Didier et Cie Libraires, 1867
Remarques
Nous avons modernisé l’orthographe tout en conservant certaines tournures d'origine (mutations, particules verbales...).
Transcription
Sébastien Marineau
Dans le même ouvrage :

III

Paotred Plouie[ou] a lavare :
– Deomp-in da c’hoût hon digarez. –

E Kemper ’dal’ ma errujont,
O aotrounez a c’houlennjont :

– Digorit d’an dud diwar ’maez,
Ma gomzint ouzh o aotrounez.

– It alese, kozh tieien,
Ma na gerit klevet poultr gwenn.

– Ni a ra forzh gant ho poultr gwenn,
Kement a reomp gant ho perc’henn. –

’Oa ket ar gomz peurachuet,
Tregont tieg a zo lazhet ;

Tregont lazhet, ha tri mil tre ;
Hag an tan er gêr, ha ken gae !

Ken a grier : ai ! aou ! ai ! aou !
Truez ! truez ! paotred Plouie[ou] !

Diskaret leizhig a dier,
Nemet hini eskob Kemper,

Hini Rosmadeg, ’n aotroù kaezh,
A zo mat d’an dud diwar maezh ;

A zo den a wad roueoù Breizh,
Hag a zalc’h mat d’hor C’hizioù* reizh.    [coutumes] 

An aotroù eskob a venne,
Er ruioù kêr pa dremene :

– Dale d’an droug, ma bugale !
En an’ Doue ! dale ! dale !

Paotred Plouie[ou], it war ho kiz,
Na vo ket mui torret ar C’hiz. –

Paotred Plouie[ou] ’sentas outañ :
– Deomp-ni war hor c’hiz, ac’hanta ! –

Hogen dre wall-chañs ’deus int graet :
N’int ket holl d’ar gêr erruet.