daskor - facebook  daskor - css

Daskor

Lez-Breizh – an Distro

Genre
Poésie
Langue
Breton
Source
Paris, Didier et Cie Libraires, 1867
Remarques
Nous avons modernisé l’orthographe tout en conservant certaines tournures d'origine (mutations, particules verbales...).
Transcription
Sébastien Marineau
Dans le même ouvrage :

    II

Marc’heg Lez-Breizh oe souezhet-bras
Da vaner e vamm pa zistroas ;

Pa zistroas a-benn dek vloaz krenn,
Ken vrudet e-touez ar varc’heien.

Marc’heg Lez-Breizh a oe souezhet,
E porzh ar maner pa oe degou’et ;

O welout eno drein o kreskiñ,
Hag al linad e toull dor an ti,

Hag ar mogerioù hanter gouezhet,
Hag a iliav hanter c’holoet.

An aotroù Lez-Breizh, o klask mont tre,
Ur c’hwragezig dall a zigore.

– Livirit-hu din-me, va mamm-gozh,
Ha degemer a gavfen henoz ?

– Degemer a-walc’h c’hwi a gavo,
Narenn, aotroù, dimeus ar re vrav.

Aet eo an tiegezh-mañ da goll
Ab’oe ’mañ aet ar mab en e roll*. –    [LV pour faire à sa tête] 

Ne oa ket he c’homz peurachuet
Ur plac’h yaouank a zo diskennet.

Ha damsellet outañ a reas,
Ha da ouelañ druz en em lakaas.

– Plac’hig yaouank, din-me leveret*,    [lavarit] 
Petra c’hoarvez ganoc’h pa ouelet* ?    [ouelit] 

– Aotroù marc’heg, deoc’h a lêrin-me
Petra ’c’hoarv ganin pa ouelan-me :

Ur breur en oad ganeoc’h am eus bet ;
Dek vloaz zo da varc’heg emañ aet ;

Ha kellies gwech marc’heg ’welan ;
Kellies gwech, va aotroù, ’ouelan ;

Kellies gwech, siwazh din, ’ouelan ;
Gant koun ouzh ma breurig paour her gran !

– Va merc’hig koant din-me leveret*,    [lavarit] 
Na breur all, na mamm n’hoc’h eus-hu ket ?

– Breur all war an douar n’am eus ket ;
Er baradoz, na lavaran ket ;

Ha ma mamm baour ivez zo aet di ;
Nemedon gant magerez en ti ;

Mont a reas kuit gant ar c’hlac’har,
Pa eas va breur da varc’heg, m’her goar,

He gwele c’hoazh en tu all d’an nor,
Hag e korn an oaled he c’hador ;

Ha ganin-me he c’hroaz benniget,
Frealz am c’halon baour war ar bed. -

An aotroù Lez-Breizh a hirvoude ;
Ken a lavaras ar plac’h goude :

– Ho mamm ivez hoc’h eus-hu kollet,
O selaou ac’hanon pa ouelet* ?    [ouelit] 

– Ya ! va mamm ivez am eus kollet,
Ha me ma-un’ am eus he lazhet !

– ’An’ Doue ! aotroù, m’hoc’h eus her graet,
Piv ’oc’h-hu, ha penaos ’oc’h anvet ?

– Morvan, ap Konan, eo va anv,
Ha Lez-Breizh, va c’hoar, va lesanv. –

Ken souezhet a oe ar plac’hig
Ken na fiche na lavare grik ;

Ken souezhet a oe ar plac’hig
Ken a vennas ganti* mervel mik ;    [LV qu’elle crut] 

Ken e zivrec’h d’e goûg a daolas,
Hag e veg d’he begig a lakaas ;

Hag e vriata hi a reas,
Hag enne, daeroù hi he veuzas :

– Doue en devoa da bellaet,
Ha Doue en deus da dostaet !

Ra vezo, va breur, meulet Doue,
Truez en deus bet ac’hanon-me. –