daskor - facebook  daskor - css

Daskor

Lez-Breizh – Morian ar roue (3)

Genre
Poésie
Langue
Breton
Source
Paris, Didier et Cie Libraires, 1867
Remarques
Nous avons modernisé l’orthographe tout en conservant certaines tournures d'origine (mutations, particules verbales...).
Transcription
Sébastien Marineau
Dans le même ouvrage :

    III

E c’hoaf en e zorn na vre’as ket,
Dre nerzh e zivrec’h hag an Dreinded !

E c’hoaf en e zaouarn na flache,
Pa varc’heke ’n eil deus egile ;

Pa varc’hekent er sal, tal-ouzh-tal,
Beg-ouzh-beg o goafoù herrus-dall ;

Herrus-dall o c’hezeg o froennat,
O’n em dantañ ken a strinke gwad ;

Ar roue gall, hag eñ kadoret,
Gant e dudjentil-veur o sellet,

O sellet hag o lavaret : Dalc’h,
Dalc’h mat ! morvran du ! gra gant ar voualc’h !

Pa lamme gantañ ar roñfl ken taer
Evel an tourmant gant al lester*.    [lestr] 

E c’hoaf en e zorn na flachas ket ;
Goaf ar Morian breviñ he deus graet.

Ken a oa goaf ar roñfl skiriennet,
Hag eñ en un taol skarzh divarc’het ;

Ha pa oant war droad war al leur-zi
Diarbenn ’reont* gant distal kriz ;    [LV ils fondirent l’un sur l’autre] 

Ha gant ar c’hleze en em fustont
Ken a grene ’r vurioù gant ar spont ;

Ha ken a daole tan o armoù
Evel houarn ruz war anne’où.

Ken a gavas an tu* ar Breton,    [LV trouvant le joint] 
Ha ’blantas e gleñv* en e galon ;    [gleze] 

Ken a gouezhas Morian ar roue,
Hag e benn gant al leur a stoke.

Ha Lez-Breizh, p’en deveus her gwelet,
E droad war e gof en deus laket ;

Hag e goaf digantañ a dennas ;
Ha penn ar Morian bras a droc’has.

Ha penn ar Morian pa oe troc’het,
Deus penn e zibr en deus e staget.

Deus penn e zibr en deus e staget
Dre e varv louet ha nezet.

Hag e gleze goadek pa welas,
Pellañ ma c’hallas eñ e daolas.

- Fae eo ganin dougen ur c’hleze
Saotret e gwad Morian ar roue ! -

Hag eñ da bignat war e varc’h feul,
Hag e-maez, gant e floc’heg d’e heul ;

Ha d’ar gêr evel ma oe degou’et,
Penn ar Morian en deus distaget ;

Hag ouzh e zor en deus e staget,
Da reiñ da sellet d’ar Vretoned.

Euzhus sell ! du e zremm, gwenn e zent ;
Ken a sponte neb a oa en hent,

Neb a oa en hent hag a selle
Ouzh e veg digor a vadailhe*.    [vazailhe, bâiller] 

Ken a lavare ar varc’heien :
– An aotroù Lez-Breizh a zo un den ! –

Hag an aotroù Lez-Breizh, a-neuze,
A lavare ivez evel-se :

– E ugent stourmad emaon-me bet.
Hag ouzhpenn mil den am eus trec’het ;

Ha biskoazh n’am boe kement a boan
Evel o c’hoari deus ar Morian.

Itron Santez Anna, va mamm ger,
C’hwi a ra burzhudoù em c’heñver !

Me a savo deoc’h un ti-bediñ,
War grec’h, etre Leger ha Gindi. –