daskor - facebook  daskor - css

Daskor

Klemmvan Itron Nizon

barzhaz breizh - klemmvan itron nizon
Genre
Poésie
Langue
Breton
Source
Paris, Didier et Cie Libraires, 1867
Remarques
Nous avons modernisé l’orthographe tout en conservant certaines tournures d'origine (mutations, particules verbales...).
Transcription
Sébastien Marineau
Dans le même ouvrage :

Allaz ! allaz ! marv itron
Maner ar Genkiz a Nizon !
Me ’wel evel ar c’houmoul du
A guzh an heol a bep tu.

– Hor mammig paour, pa ’n emaoc’h mui,
Piv ’dorro pelloc’h hon naon-ni ?
Piv ’roy deomp dilhad ha louzoù ?
Piv ’bareo hor goulioù ?

A-dal’ ar gêr a Gemperle
Betek Nizon ni a ouele,
E bordig an hent daoulinet
’Hed peder lev hon eus gouelet ;

Gouelet hon eus da heul ar c’harr
’Zo bet ouzh ho kas d’an douar ;
Gouelet hon eus e-tal ho pez
Gouelañ ’raimp e-pad hor buhez.

Pebezh kañv, siwazh, er maner !
Pebezh kañv er vro, itron ger !
Kenavo, hor mamm dous ha mat ;
Perak ’oc’h-hu deut d’hor c’huitaat ? –

– Peorien, peorien geizh, ho taeroù
Zo dreist an holl meuleudioù ;
Koulskoude n’eo ket ret gouelañ
Pa ’mañ hor mamm e-barzh ar joa.

Pa ’mañ gant ar Werc’hez santel,
Gant Jezuz hag an Ebestel,
Gant ar Sent hag ar Sentezed,
Gant he div verc’h, gant he fried.

Ar beleg e-tal he gwele
Gant ur vouezh dous a lavare :
« Sent ha sentezed eus an neñv,
Deu’t da zegemer va ene ;

Deu’t ’ta, ma c’hellin evit mat
Karout, ganeoc’h, Doue hon Tad,
Er Baradoz da virviken. »
Neuze e teuas da dremen.

Tremen he deus graet gant douster,
Evel o c’hoarzhin, hor mamm ger ;
Evel m’he defe gwelet dor
Ar Baradoz dezhi digor.

Edo gouel Maria-Garmel,
Gouel dudius evit mervel,
Edo abardaez ar gwener,
Deiz bras ma varvas ar Salver.

Tavit ’ta, peorien geizh, tavit,
Na ouelit ket, ma he c’harit :
Mat da vediñ a oa an ed,
An aelez o deus her medet.

Ar wezenn gozh a zo pilet,
E dra gant ar Mestr a zo aet,
Koulskoude meur a blant yaouank
A chom war he lerc’h stank-ha-stank.

An evnigoù a c’hello c’hoazh
Neizhiañ dindan an delioù glas,
Ha kanañ meuleudi Doue
Na laosk evn na den dibourvez.

Leveromp an De Profundis
E-tal bez itron ar Genkiz,
Ha ra vo skrivet war he maen :
AMAÑ EMAÑ MAMM AR BEORIEN.

Ar werz zo graet gant ur beleg,
Bet kure e parrez Rieg,
Hag a gare, hag a garo
Da viken an itron varv.

Endra ma chomo e buhez
E lavaro pep mintinvezh
Ur Memento ’vit e vamm gozh ;
Ma’z ay ganti d’ar Baradoz ! –