Floc’h Loeiz trizek (3)

Rumm
Barzhoniezh
Yezh
Brezhoneg
Orin
Paris, Didier et Cie Libraires, 1867
Evezhiadenn
Reizhet hon eus an doare-skrivañ, ha dalc’het hon eus gant troiennoù orin (ar c’hemmadurioù, ar rannigoù, h.a.).
Treuzskrivañ
Sébastien Marineau
En hevelep levr :

    III

Floc’hig ar roue a lâre,
War ar c’hentañ daez* pa bigne :    [degré] 

– Ne ran forzh da begoulz mervel
Pa n’d* divroet, pa n’d* diskoazell    [LV n’était] 

Pa n’d divroet, pa n’d diskoazell,
pa n’d ur c’hoar ’meus e Breizh-Izel.

Hi ’vo bep noz o c’hervel breur,
O c’hervel breurig e pep eur. –

Floc’hig ar roue a lâre,
War an eilvet daez pa bigne :

– Me ’garfe, kent hag ar marv,
Klevet keloù dimeus va bro ;

Klevet keloù dimeus va c’hoar,
Va c’hoarig kaezh ; daoust hag hi ’oar ?

Floc’hig ar roue a lavare,
War leinig ar groug pa bigne :

– Me ’glev ar ruioù o krenañ,
Gant heul va c’hoar o tont amañ !

Va c’hoar zo erru da’m gwelet,
En anv Doue ! gorto’et ! –    [gortozit !] 

Ar penn-archer ’neus respontet
D’ar floc’hig, p’en deus her klevet :

– Kent ha ma vezo erruet,
C’hwi a vezo bet dibennet. –

Itron Bodinio a-neuze*    [LV en ce moment-là même] 
Gant re Bariz a c’houlenne :

– Petra ’foul* zo ’touez ar wazed ;    [LV pourquoi cette multitude] 
Kement-mañ zo ’touez ar merc’hed ?

– Loeiz trizek, Loeiz an treitour
A laka dibenn ur floc’h paour. -

’Oa ket ar gêr peurlavaret
Evel m’he deus he breur gwelet ;

Gwelet he breur kaezh daoulinet,
E benn war ar c’hef-lazh soublet.

Hag hi ha douch*, en un hopañ :    [LV et de s’élancer au galop de son cheval] 
– Va breur ! va breur ! laoskit-eñ ’ta !

Laoskit-eñ ganin, archerien,
Me ’rey deoc’h kant skoed aour melen ;

Me ’rey deoc’h, evel un diner,
Daou c’hant mark arc’hant Landreger. –

Gant ar groug ’dal’ ma tegoue’as,
Penn he breur troc’het a goue’as,

Ken a strinkas gwad war e lenn*    [LV voile] 
Hag eñ ’ruilhas a-benn-da-benn*    [LV du haut jusqu’au bas]