Floc’h Loeiz trizek (2)

Rumm
Barzhoniezh
Yezh
Brezhoneg
Orin
Paris, Didier et Cie Libraires, 1867
Evezhiadenn
Reizhet hon eus an doare-skrivañ, ha dalc’het hon eus gant troiennoù orin (ar c’hemmadurioù, ar rannigoù, h.a.).
Treuzskrivañ
Sébastien Marineau
En hevelep levr :

    II

Eñ ’lâre, dre doull an alc’hwez,
Da Benfeunteunioù, er c’houlz-se :

– Yannig, te va brasañ mignon,
Selaou un tammig ac’hanon :

Kae d’ar maner betek ma c’hoar,
Ha lavar de’i emaon war var*,    [LV en danger, cf. en arvar] 

War wir var da goll ma buhez,
Dre gemenn an aotroù ar roue :

Ma zeufe ma c’hoar bet’ ennon
Konfort a refe da’m c’halon. –

Penfeunteuniou ’dal’ m’e glevas,
Etrezek Kemper e redas ;

Kant lev ha tregont zo, war-dro,
Etre Pariz ha Bodinio ;

C’hoazh ’neus o graet ar paotr Kerne,
E div noz hanter hag un deiz.

Pa eas tre er sall Bodinio,
Oa gouloù enni tro-war-dro ;

An itron a oa o koanio
Gant tudjentil vras eus ar vro.

Hag en he dorn un hanaf mar*    [LV une coupe de madre] 
Leun a win ruz a wellañ barr.

– Floc’hig koant dimeus a Gerne,
Peseurt keloù zo ganout-te,

Pa ’maout ken glas hag an askol,
Ken diflak hag ur yourc’h war goll ?

– Ar c’heloù zo ganin, itron,
’Lakay ho taoulagad da ouelañ :

Ho preurig paour a zo war var,
Mar zo bet biskoazh war zouar ;

War wir va da goll e vuhez,
Dre gemenn an aotroù ar roue.

Ma yefec’h bet’ ennañ, itron,
C’hwi ’refe konfort d’e galon. –

Kement e oe bet strafuilhet
An itron gaezh, ouzh e glevet,

Kement e oe bet strafuilhet,
Ken e laoskas an hanafed* ;    [hanafad] 

Hag e strewas gwin war an doal*.    [daol] 
’Troù Doue ! houmañ arouez fall !

– Buan ! paotred ar marchosi !
Buan ! daouzek marc’h !  ha deomp de’i !

Pa grevfen unan e pep poz,
Me ’yelo da Pariz* fenoz ;    [sic] 

Pa grevfen unan e pep eur,
Fenoz ez in betek va breur. –