daskor - facebook  daskor - css

Daskor

Paskou-Hir, ar c’hemener,
Zo aet da ober al laer
Abardaez-noz dirgwener.

N’helle mui ober bragoù :
Aet an dud d’an armeoù
Ouzh re Vro-C’hall hag o rou’.

Aet eo tre ti ar C’horred
Gant e bal, ha da doullet
Da glask an teñzaour kuzhet.

An teñzaour mat a gavas,
Ha d’ar gêr o redek bras ;
Ha ’n e wele ’n em lakaas.

– Serrit an nor, serrit kloz !
Setu an Duzigoù noz.

– Dilun, dimeurzh, dimerc’her,
Ha diriaou ha dirgwener !

– Serrit an nor, mignoned,
Setu, setu ar C’horred !

’Maint o tont tre ’barzh ar porzh,
’Maint ennañ o tañsal forzh.

– Dilun, dimeurzh, dimerc’her
Ha diriaou ha dirgwener !

– ’Maint o pignat war da dei ;
’Maint ’ober un toull ennei.

Krapet ’out, mignonig paour,
Taol kuit buan an teñzaour.

Paskou paour, te zo lazhet !
Taol warnout dour benniget ;

Taol da liñsel war da benn ;
Paskou, ne fich ket a-grenn.

– Siwazh din ! ’maint o c’hoarzhin ;
Neb a zidec’hfe ’ve fin.

Aotroù Doue ! Setu ’nan,
E benn dre ’n toull a welan.

E zaoulagad ruz glaou-tan !
’Mañ en traoñ gant ar peulvan.

’Troù Doue ! unan, daou, tri !
Mont en-dro war al leur zi !

Lamm a reont o kounnariñ.
Taget ’on, Gwerc’hez Vari !

– Dilun, dimeurzh, dimerc’her
Ha diriaou ha dirgwener !

« Kemenerig, kemener,
Roc’hal a rez aze, lêrer !

« Kemener, kemenerig,
Tenn da fri ’maez un tammig !

« Deus da ober un dro-zañs,
Ni ’zisk’e’i dit ar c’hadañs ;

« Kemenerig, kemener !
Dilun, dimeurzh, dimerc’her.

« Deus d’hol laerezh ur wech all,
Deus, kozh kemenerig fall :

« Ni ’zisk’e’io dit ur bal
A rey da’z mell-kein strakal.
Pa’z arc’hant korr tra na dalv. »