daskor - facebook  daskor - css

Daskor

ar Breur mager (1)

Genre
Poésie
Langue
Breton
Source
Paris, Didier et Cie Libraires, 1867
Remarques
Nous avons modernisé l’orthographe tout en conservant certaines tournures d'origine (mutations, particules verbales...).
Transcription
Sébastien Marineau
Dans le même ouvrage :

    I

Bravañ merc’h dijentil a oa dre-mañ tro-war-dro,
Ur plac’h triwec’h vloaz, Gwenolaig he anv.

Marv an aotroù kozh he div c’hoar baour, hag he mamm,
Marv holl dud he zi, siwazh de’i ! ’met he lezvamm.

Truez oa he gwelet war dreuzoù dor ar maner,
O skuilhañ daeroù druz, hag hi ken reizh ha ken kaer !

O sellet war ar mor, o klask lestr he breur mager,
He holl gonfort er bed, oa he c’hortoz pell amzer ;

O sellet war ar mor, o klask lestr he breur mager ;
Achuet oa c’hwec’h vloaz ’ba oa aet kuit deus ar gêr.

– Tec’hit tu-hont, ma merc’h, hag it da glask al loened ;
Ne an ket d’ho magañ evit chom aze kousket. –

Div teir eur kent an deiz hi oa dihunet ganti,
Er goañv, da c’hwezhañ tan, ha skubañ pep korn an ti ;

Da vont da gerc’hat dour da feunteun gouer*-ar-c’horred,    [gouver] 
Gant ur c’hozh podig toull hag ur sailhig dizeonet*.     [LV fendu] 

An noz a oa teñval, an dour oa bet strafuilhet
Gant karn marc’h ur marc’heg o tistreiñ eus a Naoned.

– Yec’het mat deoc’h plac’hig ; ha c’hwi a zo dimezet ? –
Ha me yaouank ha sod a respontas – N’ouzon ket.

– Ha c’hwi zo dimezet livirit din, me ho ped.
– Salv ho kras, aotroù ker, dimezet c’hoazh n’emaon ket.

– Dalit ma gwalenn aour, ha d’ho lezvamm lavaret*    [lavarit] 
’Maoc’h dim’et d’ur marc’heg o tistreiñ eus a Naoned ;

Gwall c’hoari a zo bet, lazhet e floc’hig du-se ;
Eñ tizhet e-unan er c’hof gant un taol kleze ;

’Benn teir s’un ha tri deiz, ha pa vo deuet da vat,
E teuio d’ar maner, laouen ha skañv, d’ho kerc’hat. –

Hag hi d’ar gêr diouzhtu, ha sellet ouzh ar bizoù :
Bizoù he breur mager oa gantañ en e zorn dehoù !