Azenorig c’hlas (4)

Rumm
Barzhoniezh
Yezh
Brezhoneg
Orin
Paris, Didier et Cie Libraires, 1867
Evezhiadenn
Reizhet hon eus an doare-skrivañ, ha dalc’het hon eus gant troiennoù orin (ar c’hemmadurioù, ar rannigoù, h.a.).
Treuzskrivañ
Sébastien Marineau
En hevelep levr :

    IV

Ne oa ket he c’homz peurlâret,
Pa d’al leur-zi oa diskennet.

– Petra ’nevez zo en ti-mañ,
Pa welan ’n daou ver ouzh an tan ?

Pa welan ’n daou ver ouzh an tan,
’N hini bras ha ’n hini bihan ?

Petra ’nevez zo en ti-mañ,
Pa erru sonerien amañ ?

Pa erru sonerien amañ,
Ha pajigoù a Germorvan.

– En ti-mañ n’eus netra henoazh,
Nemet ho eured ’zo warc’hoazh.

– Mard eo ’benn warc’hoazh ma eured,
Mont a rin abred da gousket,

Hag ac’hano ne savin ket,
Ken da lienañ ’vin savet. –

’Tronoz beure pa zihunas,
He matezhig-gambr ’erruas ;

He matezhig-gambr ’erruas,
Hag er prenestr en em lakaas :

– Me ’wel an hent, ha poultr ennañ,
Gant kalz roñsed o tont amañ :

An aotroù Youenn ’penn kentañ,
Ra vo torret e c’hoûg gantañ !

D’e heul, ha flec’h ha marc’heien,
Ha kalz tudjentil ’hed an hent.

Ha dindanañ ’n inkane gwenn,
Ur stern aouret war e gerc’henn ;

Ur stern alaouret penn-da-benn,
Un dibr voulouz ruz war e gein.

– Mallozh d’an eur e teu amañ !
Da’m zad, da’m mamm, ar re gentañ !

Difennet eo d’an dud yaouank
Da heuliañ, er bed-mañ, o c’hoant. –