Delioù kouezhet

Rumm
Barzhoniezh
Yezh
Brezhoneg
Orin
Da bep testenn e vammenn
Evezhiadenn
Reizhet hon eus an doare-skrivañ, ha dalc’het hon eus gant troiennoù orin (ar c’hemmadurioù, ar rannigoù, h.a.).
Sklêrijennoù
Kroaz ar Vretoned, 07/12/1919
Treuzskrivañ
Sébastien Marineau
En hevelep levr :

    war don Luskell ha glac’har

Ar plac’hig, en noz-se, a yeas c’hoazh da vale
     Dindan ar c’hoad, ouzh sklêrijenn al loar,
     Evit gouelañ d’an delioù a gouezhe d’an douar...

Hag an delioù, ivez, ouzh ar verc’hig a ouele :
     Pa zispakent, gant miz mae ha glizhenn,
     He c’halon a zigore, splann evel ur rozenn ;

Evel ur rozennig, ur rozennig a c’hwezh-vat,
     C’hoantaet kalz diseblant un devezh
     Ha karet, e gwirionez, karet da-c’houdevezh.

« Ha perak, emezi, n’hall ket ar garantez pad ?
      » Daou zen yaouank, p’o deus en em ouestlet,
      » A dlefe gallout bevañ hep bezañ trubuilhet...

» Ma-unanig bremañ, me a soñj gant poan-spered,
      » Pa zistone ma mouezh beure ha noz
      » E-barzh traonienn ha menez, e-barzh lanneg ha roz.

» D’ar c’houlz-se, ma c’hredit, me a vousc’hoarzhe bepred ;
      » Me a gare ha ne c’houl’en netra :
      » Karout ha bezañ karet... gwellat da beadra !

» Ha pebezh rann-galon distreiñ war ma buhegezh !
      » Huñvre garet, huñvre ma ugent vloaz,
      » O ! perak ober din-me ken dourek-all gouelañ ?

» An delioù o vervel, krisat heñvelidigezh
      » Gant pep huñvre graet ganin-me gwechall,
      » Pa oa dinec’h ma spered, ma c’halon didamall !

» Devezhioù kaer-meurbet, komzoù roet hep distro,
      » Nac’het ’oc’h bet holl a bep eil ganin,
      » Me a garfe ho kavout... ha ne dalve mui din !

» Bezit, bezit, mar plij, bezit evidon marv :
      » Pa valein, mantret gant kalonad,
      » Na glemmit ket, me ho ped, evel delioù ar c’hoad.

» Rak, pa glevan amañ un deliennig hepken,
      » E seblant din gouzañv ar rebechoù
      » A red din gwech hag amzer, ha stankoc’h a-wechoù.

» Me, gwechall ken seder, a hirvoudo da viken :
      » Tudoù yaouank, dalc’hit en an’ Doue,
      » Dalc’hit start d’ar ger roet, dalc’hit start war ma feiz ! »