VII diviz

Genre
Théâtre
Langue
Breton
Source
Brest, Moulerezh ru ar C’hastell, 1933
Remarques
Nous avons modernisé l’orthographe tout en conservant certaines tournures d'origine (mutations, particules verbales...).
Transcription
Sébastien Marineau
Dans le même ouvrage :

GUILCHER, ANTON, BERTEL, BALIBOUZIG

BERTEL
Alo ! Anton, laka da gorn-boud da seniñ kaer, hag an dud a zeuio. Anton a laka e gorn-boud da seniñ div pe deir gwech. Ur bagad tud diwar ar maez a zeu. Bertel a denn ur follenn baper eus e c’hodell, hag a lenn, uhel e vouezh.
Digorit frank ho tivskouarn hag e klevot. Emaomp o lakaat foar war gozh traoù ha traoù kozh a zo da Venead Guilcher. Hervez ur gourc’hemenn o tont a-berzh an aotroù barner eo e vezo graet ar werzh-se, hag an arc’hant dastumet a vezo lakaet da baeañ dleoù Benead Guilcher. Ha setu amañ, war-lerc’h, roll an traoù a vezo gwerzhet : da gentañ, un armel gaer, un armel brenn, nevez-flamm, koulz lavarout.

GUILCHER
An armel-se n’eo ket din-me. Da’m c’hoar eo ez eo ; hi he deus he frestet din.

BALIBOUZIG
Ne, ne, n’eo, ke, keket… gwir.

BERTEL drougig ennañ, goapaüs
Ne, ne, ne, ne, keket ; ro peoc’h din, Balibouzig ; gwelloc’h eo kalz dit tevel ; n’ouzout nemet gagilhat. Ro peoc’h, hein ? O lenn adarre. D’an eil, gwerzhet e vezo, goude-se, ur varrikenn dev, mat-kenañ da lakaat dour, gwin glaou, patatez, ar pezh a gerot.

GUILCHER
Toullek eo, ha faoutet, hag, ouzhpenn, he strad a zo aet kuit, abaoe pel, na n’ouzon ket da belec’h.

BALIBOUZIG
Ga, ga, gagaga, ga… gaou…

BERTEL droug ennañ, goapaüs
Ga, ga, ga, ga, ga ! Ur wech c’hoazh, Balibouzig, ro peoc’h ; tevel a ri, hein ?

BALIBOUZIG
Ya, a, a, a ; ya, a, a.

BERTEL
Goude gwerzh ar varrikenn, e vezo gwerzhet un daol-zebriñ eus ar re gaerañ.

GUILCHER o c’hoarzhin
Ha, ha, ha, ha ! ur pezh kaer, sur ; hanter vrein eo, ha n’he deus nemet tri zroad e-lec’h pevar. Ur pezh kaer, ya !

BALIBOUZIG
Neu, neu, n’eus… neu, neu, neu, n’eus…

BERTEL droug bras ennañ, hag o c’hourdrouz
Balibouzig ! peogwir n’out ket evit tevel, klev ! Lavar adarre ur gagilherezh bennak, unan hepken, hag ez in kuit hep peurober ar werzh. Klevout a rez, hein ?

BALIBOUZIG
Ya, a, a, a ; ya, a.

BERTEL
Bez ez eus, ivez, da werzhañ, ur pemoc’h bihan. Evitañ da vezañ treut, gwerzhet mat e vezo, evelato, fiziañs am eus. O sellout war-du ar maez. Sell ! sell ! setu o tont davedomp an aotroù Stefan, segretour kentañ an aotroù barner. Petra en divije da lavarout deomp ? Stefan a zeu.