III diviz

Genre
Theatre
Language
Breton
Source
Brest, Moulerezh ru ar C’hastell, 1933
Notice
The spelling has been modernized, but some forms (mutations, verbal particles...) has been kept.
Transcription
Sébastien Marineau
In the same work :

GUILCHER e-unan, d’an dud. Azezañ a ra.
Klevet hoc’h eus, heiñ ? Klevet hoc’h eus mat ar pezh am eus displeget da Valibouzig. Hel lavarout a ran, ivez, deoc’h. An ed, ar foenn, ar patatez, ar c’harotez, ar boetrabez, ar panez, an avaloù, an holl draoù, koulz lavarout, a zo bet teuzet gant ar glav. Petra da ober, neuze, hein ? Mervel gant an naon, sur. Nag a boan o deus an dud vat da c’hounit o sammig bara ! Ouzhpenn-se, Balibouzig, ar c’hozh kemener-se a dremen e amzer da’m heskinañ evit e ugent skoed an diaoul. Ma n’eo ket un druez ! Ouzhpenn-se c’hoazh, un dra all a zo ha kant gwech gwashoc’h eget ar baourentez. Petra eo ? n’ouzoc’h ket ? O sevel hag o treiñ e gein war-du an dud. Sellit ouzhin ‘ta ! N’eo ket diaes-bras her gwelout. Sellit ouzh an tortenn dev am eus, a-us da’m c’hein. P’emaon o tremen, ar vugaligoù a ra goap ac’hanon ; an dimezelled koant a c’hoarzh. Ma ven-me pinvidik, reiñ a rafen hanter kant mil, tri ugent mil, kant mil lur zoken d’an hini a ve gouest da bellaat diouzhin ar voull am eus etre va divskoazh ; met paour ‘on, va Doue, ha n’eus netra da ober, siwazh din. Klevout a reer Lomig o kanañ er maez. Guilcher a azez da selaou.

LOMIG er-maez, laouen e vouezh

war don Me eo Yannig a Benprad (pardon Yann Vras, savet gant P. Tr.)

    En hor Breizh karet, pa vez
    An neñvoù sklêr ha glas, (bis)
    ‘Hed an deiz, al levenez
    Em c’halon a vez bras.

        Diskan
    Kan a-bouez-penn, Lomig   )
    Kan evel un evnig              ) bis

    Evit bevañ, bihan tra
    A zo ret din, bemdez ; (bis)
    Soubenn, patatez, bara
    Hag ur skudellad laezh.

    Kan a-bouez-penn, Lomig    )
    Kan evel un evnig                ) bis

    E mereri vras Kerloc’h
    Am eus, me, pa gouskan, (bis)
    Ur gwele kolo tommoc’h
    Eget un tantad lan.

    Kan a-bouez-penn, Lomig       )
    Kan evel un evnig                  ) bis

Lomig a dav.

GUILCHER d’an dud
Pebezh mouezh ! va Doue, pebezh laouenidigezh ! Kanañ a ra, ar paotrig-se, ken mat ha ken brav hag un evnig diskennet eus an neñvoù. Ha n’eo ket souezh ; yaouank eo, ha laouen, a dra sur, ha pa vezer laouen, ar vouezh a zeu, hep poan, eus ar c’hourlañchenn, evel an dour fresk eus ar feunteun. Lomig, atav er-maez, a gan adarre.

LOMIG
    Karout a rin da viken
    Va dousig Gwenola (bis)
    Selaouit va c’hanaouenn
    Tra la la la la, la !

    Kan a-bouez-penn, Lomig   )
    Kan evel un evnig                  ) bis

GUILCHER o c’hervel
Deus amañ, va mignonig, deus amañ.

Lomig a zeu, e foued en-dro d’e c’houzoug.