VI diviz

Genre
Théâtre
Langue
Breton
Source
Saint Brieuc, Moulerezh Sant Gwilherm, 1913
Remarques
Nous avons modernisé l’orthographe tout en conservant certaines tournures d'origine (mutations, particules verbales...).
Transcription
Sébastien Marineau
Dans le même ouvrage :

LOULL, YANNIG, KROGENNEG

KROGENNEG o saludiñ
Me ho salud gant doujañs, aotroù barner.

LOULL rust e vouezh
Perak e teuit amañ ? Ne varner ket hiriv, c’hwi a oar, ha labourat start a ran gant va grefier, peogwir hon eus un nebeudig amzer ganeomp. Petra ’fell deoc’h ? Yannig a gren atav.

KROGENNEG
Me a c’houlenn pardon diganeoc’h, aotroù barner ; kaset ’on bet abaoe dec’h hepken, er vro-mañ, met un dra vras am eus da lavaret deoc’h. Yannig, deuet da vezañ foll gant ar spont, a gouezh dindan an daol.

LOULL
Ha, va Doue, va Doue ! va grefier paour kouezhet dindan an daol. Roit un tammig skoaz din, mar plij, evit e sevel diwar an douar.
Loull ha Krogenneg a laka a-nevez Yannig war e gador. Yannig a gren atav.
Va grefier a zo klañv-bras, pell zo. Ne c’hellin ket mirout, pelloc’h amzer, e garg dezhañ, siwazh !

KROGENNEG gant truez
Paourkaezh aotroù. Petra en deus ?

LOULL
Droug Sant Yann a zo gantañ.

KROGENNEG
Paourkaezh aotroù !

LOULL
Ha petra eo ar pezh hoc’h eus da lavaret din ?

KROGENNEG
Deuet ’on dirazoc’h, aotroù barner, a-berzh an aotroù Bolod, medisin chatal. Hennezh a zo bet laeret e sac’h, m’edo e-barzh e vinviajoù, e zilhad hag e lein. Laeret eo bet ar sac’h e porzh ostaliri ar Marc’h Gwenn. Yannig c’hoant kousket gantañ, a zigor frank e c’henoù hag a laosk ur vlejadenn vihan.

LOULL
Feiz va Doue, me ’anavez al laeron, her c’hrediñ a ran a-walc’h ; n’eus nemet ur pennadig, va grefier ha me, hon eus gweket o tremen, er-maez, daou ribler eus ar re gaerañ, gwisket gant tammoù kozh dilhad fall. Unan anezho a oa ur sac’h tev war e gein. Ho taou labous eo, a gav din. Ar re-se n’int ket pell, a dra sur. O redek war o lerc’h diouzhtu, va mignon, gant ar ru vras, du-hont, kregiñ a reot enno ; met hastit afo ! hastit buan.

KROGENNEG
Ya, aotroù barner. Denez a zeu e-barzh.